Bandaríska flóðviðvörunarstofnunin gaf út flóðbylgjuviðvörun fyrir ákveðin svæði í Kyrrahafi í nótt í kjölfar skjálfta, sem mældist 7,6, við frönsku eyjaþyrpinguna Nýju-Kaledóníu. Flóðbylgjur hafa sést á svæðinu og eru íbúar á Nýju-Kaledóníu hvattir til að forða sér af láglendi. Það sama á við á Vanúatú. Ekki er talin hætta á ferðum að svo komnu máli á öðrum eyjum í Kyrrahafi.

Aðvörun bandarísku flóðaviðvörunarstofnunarinnar er á lægsta stigi og gildir aðeins fyrir Nýju-Kaledóníu og Vanúatú. Skjálftinn varð klukkan 15.18 að staðartíma, 4.18 að íslenskum tíma, og voru upptök hans um 20 km austsuðaustan við eyjuna Maré. Upptökin voru á 10 km dýpi að sögn bandarísku jarðskjálftastofnunarinnar.

Varað er við allt að þriggja metra háum flóðbylgjum við Nýju-Kaledóníu og Vanúatú og allt að einum metra við hluta af Fiji.

Engar fregnir hafa borist af manntjóni né eignatjóni af völdum skjálftans. Eftirskjálftar upp á 6 og 5,9 hafa riðið yfir í kjölfar stóra skjálftans.