Í haust var skýrt frá því að Anna Britta Nielsen hefði dregið sér sem nemur um tveimur milljörðum íslenskra króna úr sjóðum danska félagsmálaráðuneytisins. Fjárdrátturinn stóð yfir árum saman en féð tók hún úr sjóðum sem eru ætlaðir þeim allra verst settu í samfélaginu. Eins og DV skýrði frá í byrjun nóvember var Anna Britta handtekin í Suður-Afríku en hún hafði látið sig hverfa úr landi áður en upp komst um fjárdráttinn. Hún situr nú í gæsluvarðhaldi í Danmörku en rannsókn málsins stendur enn yfir. Í gær skýrðu danskir fjölmiðlar frá því að tengdasonur hennar virðist vera á sömu línu og Anna og stundi svikastarfsemi.
BT segir að Kian Omid Mirzada, sem er kvæntur Karina Jamilla Hayat, dóttur Anna Britta, reki fyrirtæki sem heitir eða hafi heitið Inventar Invest. Fyrirtækið hafi meðal annars svikið eiganda kráar á Suður-Jótlandi. Hann pantaði eldhústæki fyrir sem svarar til rúmlega 100.000 íslenskra króna hjá fyrirtækinu á heimasíðu þess. Tækið fékk hann aldrei og hann telur peningana vera glataða. Búið er að loka heimasíðunni.
BT segir að Mirzada reki svikafyrirtækið sem hafi nú skipt um nafn og sé staðsett í Hvidovre. Nú er það skráð sem verktakafyrirtæki í byggingaiðnaði. Áður en það skipti um nafn seldi það eldhúsbúnað til veitingastaða. Inventar Invest leigði sýningarsal í Hvidovre af öðru fyrirtæki en Mirzada lét sig hverfa þaðan í sumar og skildi eftir sig ógreidda reikninga vegna leigu.
BT reyndi að ná sambandi við Mirzada en hann vildi greinilega ekki ræða við blaðamenn og lét ekki ná í sig.
