Þetta kemur fram í viðtali The Sun við hann. Haft er eftir Edgar að hann sé sannfærður um að hópur barnaníðinga hafi numið Maddie á brott.
„Henni er líklega haldið fanginni, hugsanlega í neðanjarðarrými eða dýflissu og hún gæti komið fram í dagsljósið hvenær sem er.“
Sagði Edgar. Hann telur hugsanlegt að hún sé enn í Portúgal og noti þá rangt nafn.
Í síðust viku var tilkynnt að Lundúnalögreglan fái aukafjárveitingu til að halda rannsókninni á hvarfi Maddie áfram. Lögreglan rannsakar nú tvær slóðir sem vísbendingar hafa borist um. Edgar telur að þetta séu hugsanlega gamlar slóðir sem muni ekki leiða lögregluna neitt áfram við rannsókn málsins. Edgar starfaði við rannsókn málsins í þrjú ár á vegum foreldra Maddie eftir að hann lét af störfum sem lögreglumaður.
„Ég hef alltaf talið að hver sá sem ber ábyrgð á þessu hafi trúað einhverjum fyrir því. Það gera þeir venjulega og það er mjög sjaldgæft að það gerist ekki, oft líða mörg ár þar til það gerist. Nú erum við að nálgast tólfta árið en það er mikilvægur tímapunktur. Ég held að hún geti enn verið á lífi og að einhver hylmi yfir þá sem rændu henni. Einhver veit hvað gerðist og það er kominn tími til að þeir gefi sig fram.“
Edgar segist telja hugsanlegt að Maddie, ef hún er enn á lífi, dvelji hjá þeim sem rændi henni í leynilegu neðanjarðarrými fjarri Algarve þar sem henni var rænt.
„Hún gæti í raun verið hvar sem er í heiminum en mitt hugboð er að hún sé í Portúgal. Það eru litlar líkur á að henni hafi verið smyglað út úr landinu án þess að einhver uppgötvaði það.“
„Einhver í Portúgal veit hvar hún er og hvað gerðist. Á meðan ekkert lík finnst, þá er von. Allir vonast til að niðurstaðan verði jákvæð og Kate og Gerry (foreldrar Maddie, innskot blaðamanns) munu aldrei gefast upp, ekki einu sinni þótt peningana þrjóti. Ég vona að þau fái svarið sem þau hafa beðið svo lengi eftir.“
