Þann 5. maí síðastliðinn braust Anthony Foord inn í hús í Folkestone á Englandi. Þar stal hann miklum verðmætum, þar á meðal eyrnalokkum og úrum auk peninga. Lögreglan hafði uppi á honum þremur dögum síðar eftir að niðurstaða DNA-rannsóknar lá fyrir en DNA úr Foord fannst á flösku sem hann skildi eftir í húsinu.

Þegar lögreglan fór inn í húsið, sem Foord hélt til í, fann hún hann steinsofandi í sófa með skartgripaboxið úr húsinu í fanginu. Talsmaður lögreglunnar segir að Foord hafi verið með um 180 muni í fanginu og í kringum sig og hafi þetta allt verið þýfi. Foord þvertók fyrir að hafa brotist inn í húsið og sagðist ekki geta gefið neina skýringu á hvaðan allir þessir munir hafi komið.

Dómstóll í Canterbury tók ekki mark á þessum skýringum hans og dæmdi hann í sjö ára fangelsi.