Eins og svo oft áður svaraði lögreglumaðurinn Jason Whitten, 33 ára, símhringingu frá örvæntingarfullum borgara þegar hann var á vakt í Santa Rosa í Kaliforníu síðasta vetur. En þetta símtal reyndist sérstaklega örlagaríkt fyrir Whitten og breytti lífi hans að eilífu.

Það var heimilislaus kona sem hringdi og ræddi við Whitten. Hún var barnshafandi og leitaði í mikilli örvæntingu að fósturfjölskyldu fyrir barnið. Whitten hafði hitt konuna áður í starfi sínu og hann fann strax í símtalinu að tilfinningarnar náðu sterkum tökum á honum.

„Eins og svo áður, þegar ég tala við fólk, fékk ég að heyra ævisögu hennar. Ég kannaðist við hin börnin hennar tvö úr búðum fyrir fósturbörn þar sem ég hef starfað. Þegar hún byrjaði að tala um þau tengdist ég henni strax böndum því ég vissi hver þessi dásamlegu börn hennar eru.“

Sagði Whitten í samtali við Good Morning America sjónvarpsþáttinn.

Whitten byrjaði á að aka konunni á meðferðarheimili fyrir áfengis- og vímuefnanotendur. Hún spurði hann hvort hann vildi ættleiða ófætt barn hennar en hann var ekki viss um að hún væri að meina þetta í raun og veru.

Í febrúar eignaðist konan litla stúlku. Þar sem konan hafði ekki náð að losna undan heróínfíkn sinni var litla stúlkan með heróín í blóðinu. Þegar barnaverndarstarfsmenn spurðu konuna hvort þeir ættu að finna fósturheimili fyrir stúlkuna bað hún þá að hafa fyrst samband við Whitten. Hún sagði þeim að í hennar augum væri Whitten hinn fullkomni faðir fyrir nýfædda dóttur hennar því hann ætti þrjár dætur.

Þann 30. ágúst var síðan gengið frá öllum formsatriðum hjá dómara og Whitten og eiginkona hans voru skráð sem foreldrar litlu stúlkunna sem hefur hlotið nafnið Harlow Maisey Whitten.

„Ég elskaði hana samstundis. Hún er svo yndisleg. Hún grætur eðlilega þegar uppfylla þarf þarfir hennar, það gera smábörn jú, en um leið og við snertum hana hættir hún að gráta. Hún vissi samstundis að hún er örugg hérna.“