Það að eyða of miklum tíma í svefn getur haft heilsufarslega áhættu í för með sér og stytt líf fólks. Þetta sýna niðurstöður nýrrar rannsóknar vísindamanna við Keele háskólann í Bretlandi.

Vísindamennirnir rannsökuðu gögn úr 74 rannsóknum sem rúmlega þrjár milljónir karla og kvenna tóku þátt í. Niðurstaða þeirra er að þeir sem sofa meira en 10 klukkustundir á sólarhring séu 30 prósent líklegri til að deyja ótímabærum dauða en þeir sem sofa í 8 klukkustundir.

Vísindamennirnir fundu samhengi á milli lengdar svefns og hættunnar á að fá hjartaáfall. Þeir sem lágu í rúminu í meira en 10 klukkustundir voru 56 prósent líklegri til að fá hjartaáfall og hættan á að fá hjarta- og æðasjúkdóma jókst um 49 prósent. Léleg svefngæði auka hættuna á hjarta- og æðasjúkdómum um 44 prósent.

Í fréttatilkynningu er haft eftir Chun Shing Kwok, sem stýrði rannsókninni, að óeðlilegur svefn sé vísbending um aukna hættu á hjarta- og æðasjúkdómum. Af þessum sökum eigi að íhuga frekari rannsóknir á lengd svefns og gæðum hans þegar fólk leitar til læknis.