Í morgun að taílenskum tíma hófst björgun taílensku fótboltastrákanna sem hafa setið fastir í helli síðan þann 23. júní. 18 kafarar héldu inn í hellakerfið snemma í morgun að staðartíma. Þetta eru 5 taílenskir kafarar og 13 erlendir en þeir eru taldir bestu hellakafarar heims. Unnið er í kapphlaupi við tíma og vatn. Stjórnendur aðgerðanna segja að aðstæðurnar nú séu þær bestu sem eru í boði en reiknað er með mikilli rigningu á svæðinu næstu daga og raunar vikur.

Á fréttamannafundi í morgun kom fram að rannsóknir hafi leitt í ljós að útilokað sé að bora niður í hellinn og bjarga strákunum 12 og þjálfara þeirra þannig.

Læknateymi eru til reiðu utan við hellismunanna til að taka við strákunum og þjálfara þeirra og veita þeim nauðsynlega aðstoð þegar þeir koma út.

Ef allt gengur eftir áætlun ætti fyrsti strákurinn að komast út úr hellinum á þriðja tímanum í dag að íslenskum tíma. Reiknað er með að aðgerðin taka nokkra daga en björgunin fer fram í áföngum.

Fréttamönnum og öðrum var vísað frá svæðinu við hellismunanna í gærkvöldi þegar lokaundirbúningur aðgerðanna stóð yfir.

Hér fyrir neðan er hægt að horfa á beina útsendingu frá vettvangi.

https://www.youtube.com/watch?v=aIsh7TcjGFk