Á sjötta tímanum voru björgunarsveitir á Suðurlandi og höfuðborgarsvæðinu kallaðar út vegna ferðamanna sem eru í vandræðum á Fimmvörðuhálsi. Þeir eru orðnir blautir og kaldir en eru í tjaldi. Vitað er hvar fólkið er en slæmt veður er á þessum slóðum, hvasst og mikil þoka.

Björgunarsveitarmenn af Suðurlandi eru lagðir af stað upp á Fimmvörðuháls. RÚV skýrði frá þessu.

Uppfært klukkan 07:45

Björgunarsveitarmenn fundu ferðamennina upp úr klukkan sjö. Fólkið er örmagna, rennandi blautt og hrakið að sögn RÚV. Björgunarsveitarmenn hlúa nú að þeim og bíða eftir að þyrla Landhelgisgæslunnar komist á staðinn til að sækja fólkið.