Skotárás átti sér stað í morgun í skóla í Santa Fe í Texas í Bandaríkjunum og eru margir sagðir hafa látist. Byssumaðurinn hefur verið handtekinn, að sögn lögreglu.
Í frétt Houston Chronicle er haft eftir lögreglu að „margir hafi látist“ en nákvæm tala virðist ekki liggja fyrir. Þá liggur ekki fyrir fjöldi slasaðra. Nemendur sem stunda nám við skólann eru á aldrinum 12 til 18 ára.
Lögregla sagði að tilkynnt hefði verið um byssumanninn klukkan 08.10 í morgun að staðartíma, eða 13.10 að íslenskum tíma. Maðurinn er sagður hafa gengið inn í skólastofu, skotið unga stúlku og haldið svo skothríðinni áfram meðan aðrir nemendur reyndu að hlaupa undan honum.
Einn lögreglumaður er sagður hafa slasast, en ekki liggur fyrir hvort hann hafi orðið fyrir skoti.
Í frétt breska blaðsins Mirror er byssumaðurinn sagður hafa verið með afsagaða haglabyssu og skammbyssu.
Uppfært klukkan 15.00
NBC Charlotte segir að heimildir innan lögreglunnar hermi að átta nemendur hið minnsta hafi látið lífið.
Uppfært klukkan 15.40
Lögregla hefur nú staðfest að átta séu látnir og tólf séu slasaðir. Ekki er ljóst hversu margir þeirra eru alvarlega slasaðir eða í lífshættu. Þetta er versta skotárás í Bandaríkjunum síðan í febrúar þegar sautján voru skotnir til bana í skóla í Parkland í Flórída.
