Elenora Rós Georgesdóttir bakari er svefnlaus og orðlaus af þakklæti eftir helgina. 

Á sunnudag hélt hún bollu pop-up í Höfuðstöðinni í Reykjavík.

„Bolludagurinn er þjóðhátíðardagur allra bakara og fyrir ofpeppara eins og mig þá er dagurinn haldin mjög hátíðlega enda uppáhalds dagurinn minn á árinu!“ sagði Elenora Rós í viðburðinum.

Í fyrra seldist allt upp á klukkutíma og sagðist hún því hafa tvöfaldað magnið af bollum í ár en benti einnig á að hún stæði ein að þessu öllu og vildi halda gæðum fram yfir magn. Sagðist hún spennt og stressuð og hafa lagt sig alla fram í vöruþróun, hugmyndavinnu og skipulagningu. 

Í dag á bolludaginn sjálfan er Elenora Rós orðlaus yfir viðtökunum, þrefalt meira magn en í fyrra, en líkt og þá var allt uppselt á klukkutíma. 

„Uppselt. Ég á eiginlega ekki orð. Hvar byrja ég? Í fyrsta og allra fremsta lagi, TAKK. Þrefalt meira magn en í fyrra, mörg HUNDRUÐ bollur og það seldist upp á KLUKKUTÍMA. Þrefalt meira magn en samt sem áður uppselt ennþá fyrr en í fyrra. Ég trúi þessu bara ekki ennþá. Takk þið ÖLL fyrir að koma, styðja mig, bíða þolinmóð og vera skilningsrík. Ég get ekki sagt ykkur nógu mikið hvað ég er þakklát.“

Í færslu á Facebook þakkar hún vinkonum sínum fyrir þrotlausa þolinmæði undanfarnar vikur, fyrir að smakka allt fyrir sig, hlusta á vangaveltur og velja fyrirsig bollurnar og stærstu ástarþakkirnar sendir hún fjölskyldu sinni sem stökk inn og stóð vaktina með henni í gær.

„Mikið ofboðslega er ég lánsöm lítil kona. Eitt sinn var bara lítil stelpa sem ætlaði sér að verða bakari þegar hún yrði stór og sama stelpa seldi upp hundruðir bolla í dag. Síðasta árið hef ég lagt þrotlaust á mig í að bæta mig, sækja mér reynslu, koma mér á hærra plan og elta draumana mína og í dag sá ég það skila sér margfalt. Þetta var nú heldur betur dagur fyrir sögubækurnar. Ég er algjörlega ósofin og ætla að fara að hvíla mig, ég er uppfull af allskonar stórkostlegum tilfinningum og hlakka til að sýna ykkur meira frá deginum á næstu dögum en þangað til þá. TAKK TAKK TAKK.“