Bakað með Láru og Ljónsa inniheldur fjölmargar uppskriftir sem henta krökkum á öllum aldri, allt frá einföldum uppskriftum fyrir byrjendur í bakstri og flóknari veislutertur fyrir þau sem vilja reyna á sig. Tilefnin til að baka eru fjölmörg og í bókinni má meðal annars finna uppskriftir að krúttlegum páskaeggjahreiðrum, gómsætum afmæliskökum, hræðilegum hrekkjavökukræsingum, litríku hollustusnarli og bæði Lárutertu og Ljónsatertu.
Systurnar Birgitta og Sylvía Haukdal eru höfundar bókarinnar en Sylvía er menntuð frá Le Cordon Bleu í deserta- og bakstursgerð og starfar sem bakari. Bókina prýða fallegar ljósmyndir Írisar Daggar Einarsdóttur auk fjölmargra litríkra teikninga af Láru og Ljónsa.
Hér fyrir neðan er uppskrift að páskahreiðri, birt með góðfúslegu leyfi höfunda og Forlagsins.
Páskahreiður
Hráefni:
- 110 g smjör
- 160 g síróp
- 150 g dökkt súkkulaði
- 150 g rjómasúkkulaði
- 200 g kornflex
- Lítil páskaegg
Úr eldhúsinu:
- Pottur
- Sleif
- Bökunarpappír
- Setjið smjör og síróp í pott og bræðið saman.
- Stillið á lægsta hita, setjið allt súkkulaðið út í og hrærið þar til allt er komið vel saman. 3. Takið súkkulaðiblönduna af hitanum og blandið kornflexi saman við.
- Mótið lítil hreiður á bökunarpappír. Það er gott að þrýsta skeið í miðjuna til að búa til holu, pláss fyrir páskaeggin.
- Setjið í kæli þar til hreiðrin eru orðin alveg stíf.
- Setjið að lokum lítil páskaegg í hvert hreiður og berið fram
