Ítalskur sælkeramatur hefur ávallt verið í hávegum hafður hjá okkur Íslendingum og bræðir bragðlauka matgæðinga. Berglind okkar Guðmundsdóttir köku-og matarbloggari með meiru sem heldur úti síðunni Gulur, rauður, grænn og salt hefur verið iðin að heimsækja Ítalíu og er hughrifin af matargerð þeirra. Einn þeirra rétta sem Ítalir gera er Saltimbocca og er í miklu uppáhaldi hjá Berglindi. Deildi Berglindi þessum rétti með lesendum Hringbrautar síðastliðið sumar og á þessi dásamlegi réttur vel við núna yfir páskahátíðina. Hér er á ferðinni sælkera uppskrift þar sem kjúklingabringur og parmaskinka eru í aðalhlutverki.

SALTIMBOCCA AÐ HÆTTI ÍTALA

3 kjúklingabringur

1 stk. parmesanostur, rifið niður eftir smekk

9 sneiðar PARMA parmaskinka

fersk salvía eftir smekk

smjör

ólífuolía

1-2 dl hvítvín að eigin vali

1 stk. sítróna

svartur pipar

Byrjið á því að skera kjúklingabringurnar í þunnar sneiðar langsum. Setjið plastfilmu yfir þær og lemjið þær niður í ca. 1 cm þykkt. Rífið niður parmesanost og setjið í miðju kjúklingsins. Leggið parmaskinku yfir bringurnar og tvö salvíublöð í miðjuna yfir parmaskinkuna. Þrýstið niður á bringurnar og þræðið upp á pinna. Leggið hvern bita í hveiti á þeirri hlið sem kjúklingurinn er. Látið smjör á pönnu og ólífuolíu og hitið. Steikið kjúklinginn á hvorri hlið í um 4-5 mínútur eða þar til eldaður í gegn. Hellið hvítvíni út á pönnuna og látið gufa aðeins upp. Takið kjúklinginn af pönnunni og leggið á disk. Kreistið smá sítrónu yfir, stráið parmesan og smá svörtum pipar. Berið fram með tagliatelle og salati.

*Allt hráefnið fæst í Bónus.