Rekstur veitingahússins The Deli, sem staðsett er á Bankastræti 14,  er til sölu. Reksturinn er í leiguhúsnæði og myndi kaupandi að rekstrinum yfirtaka leigusamning um húsnæðið.

Veitingahúsið er auglýst til sölu á fasteignavef Mbl.is en í lýsingunni segir að um sé að ræða lítinn sælkerastað sem sé þekktur fyrir vandaða og gæðamikla ítalska matargerð.

Húsnæðið sem hýsir staðinn er 61,5 fermetrar og skiptist það í sal og vinnusvæði. Í salnum eru borð sem föst eru við vegg en þar geta viðskiptavinir setið, innfelld lýsing er í loftum og gólfsíðir gluggar. Aftan við afgreiðslusborðið sem skilur að salinn og vinnusvæðið er að finna ýmis tæki og tól sem fylgja með rekstrinum. Í aftara hluta húsnæðisins er flísalagt salerni með glugga auk geymslu.

„Hér er tækifæri að eignast þekkt og rótgróið veitingahús á besta stað í borginni,“ segir í lýsingunni á rekstrinum. „Fjöldi fastakúnna sækja staðinn, menntaskólanemar, stórir vinnustaðir eru í göngufæri og einnig á gríðarlegur fjöldi ferðamanna leið framhjá staðnum á leið sinni upp á Skólavörðuholtið.“