Matarvagninn Silli Kokkur lenti í öðru sæti í stærstu götubitakeppni Evrópu, European Street Food Awards þar sem Silli fékk um leið verðlaun fyrir besta borgarann á hátíðinni. Eins og fram kemur á vef Fréttablaðsins tóku alls sextán götubitastaðir þátt að þessu sinni og kom heildarsigurvegarinn frá Skotlandi. Keppnin fór fram í Þýskalandi.
Besti götubiti Evrópu er valinn ár hvert á hátíðinni European Street Food Awards. Í ár sendu sextán þjóðir fulltrúa á hátíðina sem fram fór í Þýskalandi. Silli segir ekki annað vera hægt en að vera ánægður með árangurinn.
„Ég er allavega með besta borgarann í Evrópu. Auðvitað er maður með blendnar tilfinningar, maður vill vinna. Maður getur samt ekki nema verið en ánægður með annað sætið. Þetta eru sextán bestu í allri Evrópu þannig næst besti er bara geggjað þó maður vilji alltaf fyrsta sætið,“ sagði Silli.
Besti þetta árið kom frá Skotlandi og kusu gestir hátíðarinnar þýska vagninn þann besta. Þrátt fyrir að hafa búist við því að enda ofarlega þá er annað sætið fram úr bestu vonum Silla. Hann hefur mikla trú á sinni vöru og er mikill keppnismaður.
Fulltrúi Íslands í keppninni, Silli Kokkur var í öðru sæti hjá dómnefnd sem og hjá gestum hátíðarinnar ásamt því að fá verðlaun fyrir að vera með besta borgarann.
Silli kokkur var valinn Besti götubiti ársins á síðasta ári á Götubitahátíðinni á Íslandi.