Þetta er svo sannarlega réttur sem „bráðnar í munni“. Flestir hafa heyrt orðatiltækið en nú fyrst skil ég það til fullnustu. Rétturinn er einfaldur og fljótlegur en djúsí með meiru.

Lítið er vitað um uppruna orðatiltækisins sem oftast er notað um eitthvað virkilega gott og mjúkt undir tönn. Ég skildi það til fulls þegar ég smakkaði þennan rétt því hingað til hef ég aldrei skilið hvernig kjötmeti getur bráðnað í munni og heldur aldrei séð ástæðu til þess að kjötfang bráðni enda er ég með annálað áferðarblæti og kýs að raða saman réttum með það í huga hvaða gerðir áferðar takast á. Hér sér þó stökkt salatið um stökkleikann því kjúklingurinn er lungamjúkur – undarlegt lýsingarorð sem merkir mjög mjúkt og það besta úr einhverju. Ég vil alls ekki blanda lungum inn í mína matargerð – sem ég hef samt náð að gera hér með þessu ranti. En orðalýsingar og matur eru annað gúmmelaði sem hægt er að velta sér upp úr endalaust – til dæmis með rauðvínsglas í hönd og þennan rétt á borði. Verði ykkur að góðu!

Kjúklingur með tvöföldum tómat og rjómaosti

Fyrir 2 fullorðna og barn eða 4 fullorðna með pasta

1 bakki kjúklingalundir (án viðbætts vatns)
150 g konfekttómatar
6 sólþurrkaðir tómatar
2 msk. fetaostur í olíu
Gott kjúklingakrydd t.d. Cajun Spice
2 msk. rjómaostur
3 hvítlauksgeirar
2-3 msk. pestó úr sólþurrkuðum tómötum og Ricottaosti
½ tsk. pipar
1 dl söxuð basilíka

Klippið hvíta spottann (sinina sem stendur stundum út úr kjúklingalundinni) og hendið.
Setjið 1-2 msk. af góðu kjúklingakryddi í eldfast mót, raspaðan hvítlauk, 1 msk. af olíu af fetaosti og hrærið vel saman.

Klippið sólþurrkuðu tómatana yfir. Hellið konfekttómötunum og fetaostinum yfir. Hrærið pestóinu og rjómaostinum saman við. Piprið yfir.

Bakið inni í ofni á 180 gráðum í 25-30 mínútur.

Stráið ferskri basilíku yfir og berið fram með klettasalati með sítrónuolíu og ristuðum furuhnetum og/eða soðnu pasta. Ef fólk er að forðast kolvetni er vel hægt að ydda kúrbít í spaghetti stíl og bera fram með. Athugið að kúr-bíturinn er borinn fram hrár, ef til vill saltaður örlítið eftir að búið er að kreista mesta vatnið úr honum.

Ath! Kúrbítsyddari er snilld og kostar ekki mikið. Fæst í flestum kokkaverslunum og í Heimkaup sem dæmi, en er flugbeittur svo farið varlega!