Hérna er uppskrift að góðu grillkvöldi. Lambaspjót með alls konar girnilegu grænmeti, ofnbakað eggaldin með ólífum og fetaosti og í eftirmat grillaðir bananar með púðursykursfyllingu. Uppskriftirnar koma frá matgæðingi DV, Unu Guðmunds á unabakar.is
Lambaspjót
600 g lambafillet-bitar (èg keypti sítrónumaríneraða bita hjá Kjötkompaníi)
1 gul paprika
1 rauð paprika
1 appelsinugul paprika
1 rauðlaukur 1 hvítlaukur 1 kúrbítur 1 askja sveppir
Saxið grænmetið allt saman niður og reynið að hafa bitana frekar í stærri kantinum.
Þræðið grænmeti og kjöt að vild á spjót.
Setjið á grillið og gefið ykkur góðan tíma til að snúa spjótunum svo allar hliðar verði jafn vel eldaðar.
Berið fram með góðri sósu.
Ofnbakað eggaldin
1 meðalstórt eggaldin
15 ólífur
Fetaostur í kryddolíu
Handfylli af ferskri steinselju
Byrjið á að skera eggaldin í meðal- þykkar sneiðar og setjið á grillið.
Saxið ólífur smátt og setjið yfir eggaldinsneiðarnar ásamt fetaosti.
Setjið í eldfast mót og inn í ofn við 180 gráður í um 10 mínútur, eða þar til fetaosturinn hefur bráðnað.
Setjið sneiðarnar á fat, klippið niður ferska steinselju og stráið yfir til að bragðbæta.
Bananar með púðursykri
4-6 bananar
4-6 msk. púðursykur
Vanilluís eða þeyttur rjómi
Kljúfið hvern banana í tvennt og takið miðjuna úr hvorum bita, eða myndið pláss til að fylla bananann af púðursykri.
Setjið um eina matskeið af púðursykri í miðjuna, pakkið inn í álpappír og grillið í um 10 mínútur.
Setjið bananann í skál og berið fram með ís eða þeyttum rjóma.
Verði ykkur að góðu.