Íslenskir netverjar á Twitter eru undrandi yfir matarvenju samlanda síns. Notandi á Reddit deilir mynd af snúði vinnufélaga síns. Þetta er enginn venjulegur snúður, margir vilja meina að þetta sé „siðlaus“ snúður. Vinnufélaginn hefur skorið snúðinn í tvennt eins og rúnstykki og sett á hann smjör og ost.
„Er þetta í alvöru eitthvað sem fleiri gera?“ Spyr maðurinn og deilir myndinni sem má sjá hér að neðan.
Aðrir notendur Reddit halda nú ekki. Eins og fyrr segir kallar einn netverji athæfið siðlaust og eru rúmlega 160 manns sammála þeirri staðhæfingu.
„Fyrst steypubílagaurinn og núna þetta,“ segir einn.
Notandinn PenguinChrist vill meina að vinnufélaginn hafi verið að reykja hass á vinnutíma.
„Áður en við vitum af vill Guðni Th banna ost á snúða,“ segir annar notandi.
Einn netverji vill gera athæfið ólöglegt. „Þetta ætti ekki að vera löglegt,“ segir hann.
Annar tekur undir sama streng og bendir fólki á að það sé hægt að tilkynna „brotið“ á heimasíðu lögreglunnar.
Prófaði snúðinn
Þrátt fyrir neikvæð viðbrögð við snúðinum ákvað einn notandi að láta slag standa og prófa snúð með smjöri og osti.
„Ég prófaði þetta eftir að hafa séð þessa mynd. Þetta er merkilega gott. Hugsið ykkur allar kaloríurnar sem er hægt að spara. Sleppa rúnstykkinu og smyrja bara snúðinn,“ segir hann.