Margar verslanir um allt land eru að loka nammibörum sínum vegna mögulegrar smithættu á COVID-19.

Allar verslanir N1 lokuðu sínum nammibörum á mánudaginn síðastliðinn. Verslanir Kvikk hafa gert slíkt hið sama.

Hins vegar eru ekki allir nammibarir landsins lokaðir.

Nammiland í Hagkaup er ennþá opið og sama á við um nammibari í verslunum Iceland. DV bíður eftir svörum um hvort það standi til að loka því.

Á vef landlæknis kemur fram:

„COVID-19 smitast á milli einstaklinga. Smitleið er snerti- og dropasmit, svipað og inflúensa. Það þýðir að veiran getur dreifst þegar veikur einstaklingur hóstar, hnerrar eða snýtir sér og annar einstaklingur andar að sér dropum/úða frá þeim veika eða hendur mengast af dropum og viðkomandi ber þær svo upp að andliti sínu. Fólk virðist ekki vera smitandi á meðgöngutíma áður en einkenni koma fram en sumir fá lítil sem engin einkenni og geta þó verið smitandi.“