Söngkonan og rithöfundurinn Birgitta Haukdal gaf nýlega út tvær nýjar bækur um Láru og Ljónsa, Lára fer í leikhús og Lára lærir að lesa. Það hefur því verið nóg að gera hjá henni undanfarið og við báðum hana um að lýsa hefðbundnum degi í lífi sínu.
„Vinnudagarnir eru mjög mismunandi hjá mér eftir árstíðum. Sumir dagar eru fyrir framan tölvuna á skrifstofunni heima þegar ég er í vinnutörn fyrir bækurnar mínar og aðrir á tónlistaræfingum, í tónlistarkennslu, upptökum og á hinum ýmsu fundum. Ég hreyfi mig mjög reglulega og útivera og göngur í náttúrunni eru í uppáhaldi. Ég stunda jóga bæði heima og á jógastöðvum og þegar það má þá líður mér best ef ég fer reglulega í ræktina. Ég er þó engin öfgamanneskja og tek stuttar æfingar og fleiri frekar en langar og erfiðar. Göngur í náttúrunni gefa mér mest og þá geri ég heima jógateygjur fyrir eða á eftir,“ segir hún.
Birgitta segist vera mjög meðvituð um það sem hún borðar og reyna eftir bestu getu að leita í hollustuna.
„En auðvitað dett ég líka í óhollustuna og er reglulegur gestur í kökubúðinni Bake me a wish í Garðabænum hjá Sylvíu systur sem gerir svo sjúklegar kökur og gotterí.“
Birgitta borðar ekki rautt kjöt. „En ég borða mikið af fiski og kjúklingi. Ég elska góð salöt og er mikill snarlari. Það er, ég elska popp, hnetur, fræ og alls konar snarl í óhollari kantinum til dæmis nachos og gvakamóle.“
Birgitta freistast gjarnan til að gera tilraunir í eldhúsinu og lýsir sér sem ágætis kokki.
„Ég er óhrædd við að gera eigin uppskriftir en þykir þó gaman að fara á netið og prófa nýjar. Eins finnst mér líka mjög notalegt að panta gott „take away“ til að brjóta upp vikuna. Ég baka með börnunum en það er ekki mín besta hlið. Sylvía systir fékk öll þau gen þannig að það er gott að treysta á hana. En við gerum kanilsnúða og steikjum kleinur reglulega saman ásamt því auðvitað að baka fyrir jólin,“ segir hún.
Morgunmatur
Ég fæ mér alla morgna engiferskot og vítamín ásamt hinum ýmsu heilsuskotum sem eru í boði. Vítamín og ómega fæ ég mér líka en morgunmaturinn er svolítið breytilegur eftir árstíðum. Þessa dagana þegar kalt er í veðri og dimmt er hann hafragrautur ásamt eplum eða ávöxtum.
Millimál
Ég borða mikið af hnetum og hollum hnetustykkjum á milli mála. Eyði löngum tíma oft í búðum að leita að góðum stykkjum. Eins á ég nánast alltaf epli eða gulrætur og kaffibollinn er alltaf á sínum stað.
Hádegismatur
Ég viðurkenni það að ég missi stundum af hádegismatnum en annars borða ég oft afganga frá kvöldinu áður. Ef ég er á ferðinni þá er ég ansi tíður gestur á Local.
Millimál á daginn
Ætli ég drekki ekki yfirleitt tvo góða kaffibolla yfir daginn.
Kvöldmatur
Þar er allur gangur á en við eldum og grillum mjög oft bleikju og kjúkling. Við erum líka mikið salatfólk svo það er alltaf mikið af grænmeti með öllum máltíðum. Ég elda þó nánast einu sinni í viku kjöt fyrir hina á heimilinu og fæ mér þá salat. Kvöldsnarl Ég borða sennilega poppkorn sex sinnum í viku. Elska að setjast niður þegar börnin eru sofnuð með popp í skál.
Ofureinföld bleikjuuppskrift sem ég geri með dassi af hinu og þessu.
