Una Guðmundsdóttir elskar allt með bræddum osti. Hver gerir það ekki? Hér fær ostur að njóta sín á klassísku lasagne sem flest öll heimili elska.
Lasagne er alltaf góð máltíð sem allir verða saddir og sælir af, ekki skemmir svo fyrir að gera góðan skammt fyrir fjóra hér á heimilinu og eiga í afganga næsta dag.
Uppskrift:
500 g nautahakk
680 g Cirio-pastasósa (eða ykkar uppáhalds pastasósa)
170 g tómat-paste
4-5 stk. gulrætur
½ gul paprika
½ rauð paprika
½ búnt fersk basilíka
4 msk. ólífuolía
1 stk. laukur
2 stk. hvítlauksgeirar
100 g lasagne-pastaplötur
250 g kotasæla
Rifinn ostur
Salt og pipar
Aðferð:
Byrjið á því að skera niður grænmetið, setjið hvítlaukinn í pressu og steikið það allt saman upp úr ólífuolíu á pönnu.
Steikið hakkið á pönnu, kryddið vel og blandið saman við grænmetið.
Blandið pasasósunni saman við ásamt tómat-paste-inu, leyfið að malla á pönnunni í um 20 mínútur.
Leggið 1/3 af blöndunni í botninn á eldföstu móti, 1/3 af pastaplötunum yfir og dreifið kotasælu yfir. Endurtakið þetta 2-3 sinnum.
Stráið svo rifnum osti yfir í lokin og setjið í ofn í 25-30 mínútur á um 200 gráðu hita.