Stjörnukokkurinn Gordon Ramsay hefur þurft að þola harða gagnrýni eftir að hann sagði upp fimm hundruð starfsmönnum í miðjum COVID-19 heimsfaraldri. Kokkurinn þurfti að loka veitingastöðum sínum vegna fyrirmæla breskra yfirvalda um að loka ýmsum stöðum í landinu, svo sem veitingastöðum og knæpum.
Gordon kallaði alla starfsmenn á sinn fund og tilkynnti um uppsagnirnar og samkvæmt frétt Metro voru margir sem felldu tár við tíðindin. Síðar sendi hann tölvupóst á starfsmennina og sagði að þeir fengju allir laun fram að 17. apríl. Gordon gat hins vegar ekki lofað neinum starfi á nýjan leik þegar að samkomubanni í Bretlandi verður aflétt.
Kokkurinn Anca Torpuc vandar Gordon ekki kveðjurnar í samtali við MailOnline.
„Við höfum lagt okkur öll fram fyrir Gordon Ramsay og síðan losar hann sig við okkur þegar við þurftum á honum að halda,“ segir hún.
„Margir fóru að gráta yfir framkomu hans. Það var engin aðdragandi. Við vorum kölluð á fund og sagt að samningum okkar væri rift. Þetta var hrottalegt.“
Anca hefur einnig gagnrýnt Gordon á samfélagsmiðlum og kallað hann skíthæl.
Gordon hefur ekki tjáð sig persónulega um uppsagnirnar en birti tilkynningu um lokanir veitingastaða á Instagram.
