Leikkonan Saga Garðarsdóttir dvelur nú í Þýskalandi ásamt eiginmanni sínum, Snorra Helgasyni, og dóttur þeirra. Saga leyfir fylgjendum sínum á Instagram að fylgjast með, en Saga er auðvitað þekkt fyrir að vera fyndin með eindæmum. Skemmtisaga af veitingastað í München ber þess merki.
„Hér má sjá misstóra fjölskyldumeðlimi í München rétt áður en okkur var færð ógirnilegasta máltíð Bæjarlands; tvær soðnar hvítar pulsur bornar fram í pulsuvatni með pretzel,“ skrifar Saga, sem var ekki skemmt þegar að maturinn kom á borðið.
„Nú verð ég að segja að ég hef aldrei fyllst jafn miklum viðbjóði fyrr en þökk sé félagsskap @helgaosk þá náði þetta ekki að brjóta mig alveg,“ bætir hún við og vísar í vinkonu sína Helgu Ósk Hlynsdóttur. „Niðurstaða: Í München er best að vera í góðum félagsskap á fastandi maga.“
Rétturinn sem Sögu blöskraði svo heitir á frummálinu Weißwurst, sem þýðir bókstaflega hvít pylsa. Um er að ræða hefðbundinn rétt frá Bæjaralandi, en um er að ræða pylsur sem búnar eru til úr kálfakjöti og beikoni. Oftast eru pylsurnar bragðbættar með steinselju, sítrónu, lauk, engiferi og kardimommum. Pylsurnar eru hitaðar í vatni, sem er við það að sjóða, í um tíu mínútur og verða þær gráhvítar eftir suðuna.
Pylsurnar eru bornar fram í heitu vatni ásamt sætu sinnepi og saltkringlu. Þykir þetta mikið lostæti en innfæddir borða pylsurnar með því að sjúga fyllinguna innan úr pylsuhúðinni.
