Það er fátt verra en að brjóta egg og sjá að það er í raun skemmt. Margir hafa eflaust einnig lent í því að eyðileggja heila máltíð eða bakkelsi með því að brjóta skemmda eggið beint ofan í skál með öðru gúmmulaði.
Það er hins vegar til mjög einföld leið til að sjá hvort egg eru ónýt eður ei, því oft segir dagsstimpillinn á umbúðunum ekki alla söguna.
Eina sem þú þarft er skál eða glas sem þú fyllir með vatni. Síðan setur þú eggið varlega ofan í vatnið, en gott er að nota skeið til þess. Ef að eggið sekkur og liggur á hliðinni á botninum á glasinu eða skálinni er það mjög ferskt. Ef það sekkur en er upprétt og skoppar aðeins upp og niður er það ekki alveg jafn ferskt en samt allt í lagi. Ef það hins vegar flýtur er það ónýtt.