Íslenska ullin hefur með undraverðum eiginleikum sínum haldið á Íslendingum hita um ár og aldir. Nú hefur Ístex þróað nýja og byltingarkennda sæng undir nafninu Lopidraumur, sem fyllt er með 100% íslenskri ull. Einstakir eiginleikar íslensku ullarinnar, með sitt tog og þel, henta afar vel í sængurgerð, en þelið hefur mikið einangrunargildi og togið veitir styrk og eykur endingu efnisins. Sængin ber eiginleika ullarinnar að því leyti að hún er mjög temprandi og töluvert minni líkur eru á að maður svitni undir ullarsæng en öðrum sængum. Fallegasta, hlýjasta og þjóðlegasta jólagjöfin í ár er án efa sæng frá Lopidraumur.
Ísland og Þýskaland í eina sæng
Ístex hf. hefur verið í þróunarvinnu með sængina í marga mánuði og er nú nýbyrjað að selja sængurnar á heimasíðu sinni lopidraumur.is. „Það voru framleiddar ullarsængur hér áður fyrr, en ekki með sömu tækni og við erum að nota í dag,“ segir Sigríður Jóna Hannesdóttir, verkefnastjóri Ístex. „Verið er að selja ullarsængur erlendis en ekki úr íslenskri ull. Sængurnar okkar innihalda um eitt kíló af mislitri ull. Það er frábært að hægt sé að nýta ullina í fleiri afurðir en band.“ Áklæðið er 100% bómull. Sængin andar vel og er létt. Búið er að kemba ullina og þvo þannig að það er ekkert mál að setja hana í þvottavél á 40°C. „Ullin er íslensk en það er lítið fjölskyldufyrirtæki í Þýskalandi sem saumar sængurnar fyrir okkur. Verkefnið hefur gengið mjög vel og við erum þeim afar þakklát fyrir gott samstarf,“ segir Sigríður Jóna.
Sængurnar koma í tveimur þykktum, þ.e. þynnri heilsárssængur og þykkari vetrarsængur, þannig að fólk getur valið sæng eftir því hversu heitfengt það er. Einnig eru tvær stærðir, einbreið og queen-size.
Gott að kúra undir ullarsænginni
„Við byrjuðum að selja sængurnar í október og við höfum fengið frábærar viðtökur hér heima. Flestir taka heilsárssængina og eru virkilega ánægðir með hana. Sjálf er ég með vetrarsængina, enda kulvís. Mér finnst sængin mjög góð og þægileg. Manni er hvorki of heitt né of kalt,“ segir Sigríður Jóna að lokum.
Sængurnar fást á heimasíðunni okkar, www.lopidraumur.is og það er frí heimsending um land allt.