Ársfundur Bjartrar framtíðar var haldinn í Hlöðunni í Gufunesbæ í Grafarvogi á laugardaginn. Æsispennandi vítaspyrnukeppni var haldin þar sem hver framboðslisti sendi tvo fulltrúa, einn karl og eina konu, til keppni sem var hörð og spennandi. Rétt er að geta þess að hlutföll kynja á listum flokksins fyrir Alþingiskosningarnar er hnífjafn án þess að settar hafi verið reglur um kynjakvóta. Í Bjartri framtíð gengur fólk alla daga með kynjagleraugu svo jöfn hlutföll eru normið. En aftur að vítaspyrnukeppninni. Í markinu stóð hin knáa Auður Ólafsdóttir, markvörður ÍR sem leikur næsta föstudag til úrslita við Grindavík um sæti í Pepsideild á næsta tímabili. Auður reyndist mörgum vítaskyttum afar erfið.
Að sögn Prebens Jóns Péturssonar, oddvita listans í Norðausturkjördæmi var þetta skemmtileg tilbreyting frá fundarstörfum: „Þetta var gaman. Maður var þarna kominn á EM í huganum og allt undir. Svo má líka líta á það sem svo að við höfum verið að taka víti fyrir þjóðina. Almenningur er orðinn langþreyttur á vinnubrögðum Alþingis og hefur ítrekað dæmt víti á stjórnvöld. Eins og við höfum klárlega séð á þessu kjörtímabili þá eru stjórnvöld í dag ekki að vinna í þágu almennings á landinu heldur einhverra allt annarra.“
Það var lið Reykjavíkurkjördæmis Suður, skipað þeim Unnsteini Jóhannssyni og Steinunni Ásu Þorvaldsdóttur og Nichole Leigh Mosty sem bar að lokum sigur úr býtum eftir harða keppni við lið Norðvesturkjördæmis með þá Matthías Frey Matthíassyni og Elínu Kristinsdóttur í fylkingarbrjósti. Björt framtíð hvetur alla til að mæta á völlinn á þriðjudag þegar íslenska kvennalandsliðið mætir Skotum. Leikurinn hefst kl. 17.
Á fundinum var stjórn Bjartrar framtíðar kosinn. Óttarr Proppé bauð sig einn fram til að gegna embætti formanns og Eva Einarsdóttir varaborgarfulltrúi og varaformaður ÍTR var kosinn stjórnarformaður. Þá voru ríflega 40 manns kjörnir í stjórnina en í Bjartri framtíð er 80 manna stjórn. Kjörtímabilið er tvö ár og því heldur helmingur stjórnar áfram nú og helmingur er endurnýjaður. Það er skemmtilegt, lýðræðislegt og skilvirkt fyrirkomulag.
