Landssamband lögreglumanna hefur lýst yfir mikilli óánægju með embætti Ríkislögreglustjóra og fagnað ákvörðun dómsmálaráðuneytis um alhliða stjórnsýsluúttekt á embættið. Þetta eru svo sem ekkert nýjar fréttir. Embætti Ríkislögreglustjóra hefur ítrekað verið gagnrýnt fyrir hin ýmsu mál. Bílamiðstöðina, fatamál, sérsveitina sem og ráðningar eða skipanir í stöður við embættið. Má finna mikinn fjölda álita umboðsmanns Alþingis um stöðuveitingar innan embættisins þar sem umboðsmaður kemst ítrekað að því að ekki hafi verið farið eftir lögum. Þrátt fyrir allt þetta þá segist ríkislögreglustjóri gáttaður á yfirlýsingu Landssambands lögreglumanna. Enginn í sambandinu hafi haft samband við ríkislögreglustjóra með kvartanir. Þetta svar ríkislögreglustjóra verður að teljast grátbroslegt í ljósi sögunnar. Jafnframt bætti hann við að réttast væri að stjórnsýsluúttektin yrði framkvæmd um lögreglumál landsins eins og þau leggja sig, en ekki einskorðuð við hans embætti. Þetta er ákaflega fullorðin leið til að mæta gagnrýni; að þykjast ekkert vita og benda bara á aðra.