Ásthildur og eiginmaður fóru fram á skaðabætur og vildu meina að sýslumaðurinn á höfuðborgarsvæðinu hafi staðið ranglega að nauðungarsölu á fasteign þeirra í Garðabæ og ekki tekið tillit til fyrningar vaxta.
Sjá einnig: Ásthildur Lóa tapaði vegna fyrningar
Arion banki fór fram á nauðungarsöluna árið 2016 og átti bankinn hæsta boðið þegar salan fór fram árið eftir. Töldu hjónin að ekki hefði verið tekið tillit til þeirra vaxta sem miða hafi átt við þegar salan fór fram. Vildu þau meina að þau hefðu átt að fá í sinn hlut 10,6 milljónir króna af söluverði fasteignarinnar við nauðungarsöluna en Arion banki greiddi alls 60 milljónir fyrir eignina. Er í niðurstöðu dómsins helsta ástæðan sögð sú að kröfur hjónanna á hendur ríkinu séu fyrndar.
Ásthildur Lóa sagði í frétt RÚV í gær að hún ætti von á því að dómnum yrði áfrýjað. Hún tjáði sig svo frekar um málið á Facebook-síðu sinni í gærkvöldi þar sem hún sagði:
„Hann kom því miður ekki á óvart dómur héraðsdóms gegn okkur Haffa í dag. Við erum löngu hætt að gera ráð fyrir réttlæti hjá íslenskum dómstólum. En lífið hefur sínar leiðir til að benda manni á samhengi hlutanna, og hvað það er sem virkilega skiptir máli,” sagði Ásthildur sem rifjaði upp að það hafi verið henni ofarlega í huga að móðir hennar, Guðný Sigríður Friðsteinsdóttir, hafi einmitt látist á þessum degi fyrir 45 árum eftir 10 ára baráttu við krabbamein.
„Mér hefði nú aldrei dottið í hug að bera þetta tvennt saman ef ekki væri sami dagur og sama dagsetning, þó 45 ár séu á milli. Dómurinn í dag var mikil vonbrigði en hann var ekki áfall og breytir ekki lífinu til frambúðar. Það gæti margt verra gerst og núna er tíminn til að líta á björtu hliðarnar,” sagði hún enn fremur.
