Sýn bauð 1.100 milljónir fyrir sýningarrétt að ensku knattspyrnunni næstu þrjú keppnistímabil. Útboðið fór fram í síðustu viku og hafði Síminn þar betur gegn Sýn. Útboðið fór þannig fram að fyrirtækin gerðu tilboð í sýningarréttinn og ef munurinn á tilboðum þeirra hefði verið innan við 10 prósent hefði verið farið í aðra umferð. Til þess kom ekki og því er ljóst að tilboð Símans var að minnsta kosti 1.210 milljónir króna.

Markaðurinn, viðskiptablað Fréttablaðsins, skýrir frá þessu í dag. Þar kemur fram að Sýn hafi metið það sem svo að hærra tilboð myndi leiða til taps af starfseminni miðað við að áhorfendur greiddu eðlilegt verð fyrir þjónustuna.

Haft er eftir Birni Víglundssyni, framkvæmdastjóra miðla Sýnar, að hann gæti ekki tjáð sig um tilboðið. Hann sagði að á annan tug þúsunda áskrifenda hefðu aðgang að enska boltanum í gegnum Sýn og niðurstaðan væri óheppileg fyrir neytendur.

Markaðurinn hefur eftir Magnúsi Ragnarssyni, framkvæmdastjóra afþreyingarmiðla og sölu Símans, að tilboðið byggist á viðskiptaáætlun um nýtingu á stökum rétti. Hann sagði að enski boltinn hafi verið dýr fyrir neytendur því þeir hafi þurft að kaupa mikið með honum. Síminn telji sig geta selt réttinn stakan og þannig náð til fleiri með ódýrari vöru.