Stóru flokkarnir tveir á grænlenska þinginu töpuðu báðir umtalsverðu fylgi í þingkosningunum í gær. Enn er verið að telja en eins og staðan er núna stefnir í að Siumut fái 26,8 prósent atkvæða en flokkurinn fékk 34,3 prósent í kosningunum 2014. Inuit Ataqatigiit (IA) fær 26,1 prósent atkvæða en fékk 33,2 prósent í kosningunum 2014.

Demókratar verða að teljast sigurvegarar kosninganna en fylgi þeirra stefnir í að verða 19,6 prósent en þeir fengu 11,8 prósent í kosningunum 2014.

Sara Olsvig, formaður IA, ræddi í morgun við formann Siumut og óskaði honum til hamingju með sigurinn er Siumut verður stærsti flokkurinn á þingi. Samkvæmt hefð þá er það stærsti flokkurinn sem fær fyrstur umboð til stjórnarmyndunar og því mun það væntanlega falla í hlut Siumut að reyna stjórnarmyndun.