Emma-Jane Kurtz, 41 árs frá Oxford á Englandi, hefur verið fundin sek um að hafa vanrækt umönnun móður sinnar um langa hríð. Móðir hennar fannst látin í sófa á heimili þeirra 2014. Lík hennar var þakið saur frá höfði og niður á tær. Kurtz þarf að afplána að minnsta kosti helming þeirra 30 mánaða sem hún var dæmd til að sitja í fangelsi. Hinn helminginn fær hún að taka í samfélagsþjónustu. Kurtz er lögmaður og hefur sérhæft sig í að annast mál fyrir eldra fólk.

Í dómsorði sagði dómarinn að Kurtz hafi skilið móður sína eftir í sófanum til að hún myndi rotna þar. Hann sagði einnig að ljósmyndir frá krufningunni á líkinu hafi helst minnt á myndir úr útrýmingarbúðum.

BBC segir að í réttarhöldunum hafi komið fram að þegar líkið fannst hafi það verið búið að liggja í fimm daga þannig að kinn lá á hné. Þegar sjúkraflutningamenn lyftu líkinu upp losnuðu buxur hennar í sundur og þeir sáu að saur og þvag hafði grafið sig fast í hendur, fætur og andlit.

Einnig kom fram við réttarhöldin að móðir Kurtz hafði verið í sömu fötunum í áratug. Kurtz sagði lögreglumönnum að hún hefði litið til móður sinnar 3-4 sinnum á dag. Dómarinn benti því á að hún hefði haft mörg tækifæri til að aðstoða móður sína og koma henni úr þessum ömurlegu aðstæðum. Hún var 79 ára þegar hún lést og talið er að hún hafi aðeins verið 39 kg þá.

Við ákvörðun refsingar tók dómarinn tillit til að Kurtz er með væga einhverfu og sækir nú tíma hjá sálfræðingi.