Maður sem vildi kaupa miða á rokktónleikahátíðina Hellfoss, sem stendur yfir á Selfossi um helgina, lenti illa í óprúttnum aðila sem þóttist vera að selja miða á tónleikana. „Manninn minn langaði rosalega mikið að fara á Hellfoss á Selfossi. Þessi einstaklingur bauðst til að selja honum miða á hálfvirði þar sem hann var búinn að missa af fyrsta degi hátíðarinnar,“ segir Janjira Dagbjört, eiginkona mannsins.
Miðann fékk maðurinn aldrei en lagði inn á hinn falska miðasala í gegnum PayPal-greiðslukerfið. Þau hafa því ekki kennitölu aðilans sem lagt var inn á.
„Manneskjan vildi að maðurinn borgaði henni í gegnum PayPal. Ég þekki það ekki neitt, er ekki með það sjálf en maðurinn minn er með PayPal sem hann notar rosalega lítið. Mér fannst þetta gruggugt til að byrja með, vildi ekki að hann myndi gera þetta en hann vissi ekki betur, greyið, enda í fyrsta skipti sem hann gerir svona. Hann gerði mistök sem hann sér eftir og honum líður mjög illa yfir þessu. En þetta var ekki há upphæð, rúmlega sjö þúsund kall. En samt peningur og ömurlegt að lenda í þessu.“
Hinn óprúttni aðili fékk manninn til að leggja inn á sig sem náinn ættingi en samkvæmt skilmálum PayPal er ekki hægt að ógilda greiðslu og fá endugreitt ef greiðslan er merkt með þeim hætti.
„Ef þú gerir það geturðu ekki kært manneskjuna eða fengið PayPal til að borga þér til baka.“
Auk þess að ræða við DV um málið greindi Dagbjört frá því í Facebook-hópnum Brask og brall. Þar fær hún yfir sig mikla gagnrýni á þá trúgirni að leggja fé inn á ókunnuga manneskju. Dagbjört segir að maðurinn hennar geri sér fulla grein fyrir því að þetta hafi verið heimskulegt og hún þurfi ekki á slíkum athugasemdum að halda.
Nokkuð auðsýnilegt er þegar Facebook-aðgangur hins falska miðasala er skoðaður að þar er um falskan reikning að ræða enda er engin virkni inni á síðunni. Hins vegar er ljóst að fólk fellur iðulega í freistni fyrir lokkandi tilboðum og verður trúgjarnt. Niðrandi athugasemdir vegna slíkra mistaka geta fælt fólk frá því að greina frá svikum sem þessum, svikum sem mikilvægt er að vara við.
Þegar kannaðar eru upplýsingar um aðilann sem móttók greiðsluna á PayPal kemur upp eitthvað sem líkist klámsíðu. Hér er skjáskot millifærslunni á PayPal:
Dagbjört segist gera sér grein fyrir því að þau hjónin fái þessa peninga ekki til baka. En hún vill vara aðra við því að falla í sömu gryfju og ekki leggja inn fé hjá óþekktum aðilum þó að tilboðið sé freistandi.
