Lilja hefur verið varaformaður frá árinu 2016 en hún og Ingibjörg Isaksen, þingflokksformaður flokksins, hafa tilkynnt framboð.
Flokksþing Framsóknarflokksins fer fram þann 14. febrúar næstkomandi þar sem nýr formaður verður kjörinn í stað Sigurðar Inga Jóhannssonar sem hefur verið formaður frá árinu 2016.
Lilja birti meðfylgjandi yfirlýsingu á Facebook-síðu sinni í gærkvöldi:
„Kæru félagar og vinir!
Framsókn hefur átt góða samleið með íslensku þjóðinni. Flokkurinn hefur tekið virkan þátt í að koma Íslandi í fremstu röð á alþjóðavísu.
Nú eru tímamót. Ég tel að flokkurinn þurfi að endurnýja erindi sitt gagnvart þjóðinni. Eftir hvatningu frá félögum mínum í Framsókn, vítt og breytt um landið, hef ég ákveðið að bjóða mig fram til formanns Framsóknarflokksins. Ég brenn fyrir hagsmunum íslensks samfélags og tel að reynsla mín og þekking geti nýst vel í þeim verkefnum sem bíða Framsóknar, innan sem utan þings. Samvinna er kjarninn í hugmyndafræði Framsóknar og verður hún leiðarljós í störfum mínum verði ég kjörin formaður. Framsókn er fjöldahreyfing sem býr yfir miklum mannauði um allt land, fólk úr öllum áttum sem vill leggja sitt af mörkum til að gera samfélagið betra. Í þessum öfluga hópi fólks liggur lykillinn að uppbyggingu Framsóknarflokksins, sem ég vil gjarnan leiða.
Verði ég kjörin formaður mun ég leggja megináherslu á eftirtalin mál:
Heimilin og atvinnulífið
Heimilin eru hjartað í íslensku samfélagi sem þarf að standa betur með, því þrengt er að stöðu þeirra. Heimilin upplifa auknar álögur í formi skattahækkana og greiðslu opinberra gjalda. Brýnasta verkefnið er að ná niður verðbólgu til að vextir geti lækkað. Sterkt atvinnulíf er lykillinn að öflugri velferð. Einfalda verður regluverk, minnka álögur og gera það enn samkeppnishæfara á alþjóðavísu. Heimagerð óvissa ríkir um þessar mundir sem dregur úr fjárfestingum og hagvexti. Stjórnvöld þurfa að leiða með góðu fordæmi, halda aftur af eigin launahækkunum og hækkunum opinberra álaga og gjalda með 2,5% þaki sem kallast á við verðbólgumarkmið Seðlabankans.
Fullveldi Íslands og alþjóðasamvinna
Frelsi og fullveldi þjóðarinnar eru undirstaða framfara. Velmegun er mest í landinu, þegar við ráðum okkar málum og auðlindum sjálf. Sjálfbær auðlindanýting er grunnurinn að þeim lífskjörum sem Ísland býr við í dag. Aðild að Evrópusambandinu mun ekki
auka hagsæld á Íslandi og hagsmunum Íslands er best borgið utan þess. Halda skal áfram góðum og nánum samskiptum við Evrópusambandið á grundvelli EES-samningsins.
Greiður aðgangur að helstu útflutningsmörkuðum þjóðarinnar er lykillinn að hagsæld, og því brýnt að Ísland sé í mikilli alþjóðasamvinnu og hagsmunagæsla Ísland sé efld til muna. Við stöndum með frænd- og vinaþjóðum okkar, styðjum við Grænlendinga og lífskjarasókn þeirra og leggjum áherslu á að alþjóðalög séu virt. Áframhaldandi samstarf í öryggis- og varnarmálum á grundvelli Atlantshafsbandalagsins verður áfram hryggjarstykki í utanríkismálum þjóðarinnar.
Framtíðin. Menntun, tækniframfarir og tungumálið
Menntun og tækniframfarir eru grundvöllurinn fyrir áframhaldandi lífskjarasókn á Íslandi. Við verðum að gera betur í því að efla menntakerfið okkar en það viðfangsefni krefst samvinnu við kennara og skólastjórnendur.
Höldum áfram að fjárfesta í menntun og ráðumst í kerfisbreytingar sem
byggja á rannsóknum, sem munu skila meiri árangri fyrir framtíð unga fólksins. Fjárfesta verður í tækniframförum, því tækifærin fyrir Ísland eru mörg á þessu sviði hvort heldur í hreinni orku, sjávarútvegi, ferðaþjónustu eða gervigreind. Tungumálið okkar, íslenskan, sameinar okkur. Fjárfestum í tungumálinu og gerum það aðgengilegt – þannig að allir geti lært íslensku. Kæru félagar, ég hlakka til samtalsins og óska eftir ykkar stuðningi! Áfram Framsókn!“
