Maður hefur verið ákærður fyrir stórfellt brot í nánu sambandi, nauðgun, tilraun til nauðgunar og kynferðisbrot gegn barni, með því að hafa án samþykkis margítrekað haft önnur kynferðismök en samræði við stjúpdóttur sína, með því beita hana ofbeldi og ólögmætri nauðung og með því að nýta sér yfirburði sína og traust hennar og trúnað sem stjúpfaðir og notfæra sér að stúlkan gat hvorki spornað við
verknaðinum né skilið þýðingu hans vegna aldurs og eftir atvikum svefndrunga.
Í ákæru héraðssaksóknara sem DV hefur undir höndum hafa verið afmáðar lýsingar á 12 brotum mannsins gegn barninu. Virðist sem þær lýsingar séu of óhugnanlegar eða stríði gegn persónuvernd barnsins til að þær komi fyrir almenningssjónir.
Ennfremur er maðurinn ákærður fyrir stórfellt brot í nánu sambandi og kynferðisbrot gegn barni með því að hafa ítrekað áreitt barnið með kynferðislegu tali.
Brot mannsins gegn barninu áttu sér stað frá vorinu 2023 og fram til haustsins 2025, á heimili þeirra. Stúlkan var sex til níu ára gömul á þessu tímabili.
Fyrir hönd stúlkunnar er gerð krafa um miskabætur að fjárhæð sex milljónir króna.
Málið var þingfest fyrir Héraðsdómi Reykjavíkur í dag, 14. janúar. Réttarhöld í málinu eru fyrir háð fyrir luktum dyrum.
