Rúmlega þúsund manns hafa skrifað undir undirskriftalista dýravina um breytingar á lögum um flugelda. Snýst hann um að finna öruggari og sanngjarnari leiðir til þess að fagna áramótum.

Hestakonan Dagrún Sunna hrundi undirskriftalistanum af stað síðastliðinn miðvikudag og gildir hann til 6. febrúar næstkomandi. Þegar þetta er skrifað hafa safnast rúmlega þúsund undirskriftir.

„Við viljum öll eiga skemmtileg áramót en ég vil að bæði mönnum og dýrum líði vel. Með þessum lista getum við óskað eftir breytingum á lögum og reglum varðandi flugelda,“ segir í færslu með undirskriftalistanum á island.is.

„Á hverju ári fögnum við áramótum með flugeldum og látum. Þetta er skemmtileg hefð en síðastliðin ár finnst mér þetta orðið aðeins of gróft,“ segir Dagrún Sunna á Facebook síðu sinni. Bendir hún á álagi fyrir slökkvilið, fjölmörg slys sem verða og gríðarlega loftmengun, einkum þegar veðrið er stillt eins og núna um áramótin.

„Það sem mér finnst þó alvarlegast í þessum málum eru áhrifin sem flugeldar hafa á dýr og ég held að fólk átti sig ekki alveg á því. Gæludýr, húsdýr og villidýr geta enga björg sér veitt í hræðilegum hvellum allt í kringum sig og fyrir þeim virðist aldrei ætla að enda. Ég þekki mörg dæmi af alls konar ofsahræddum dýrum en ég hef mesta reynslu sjálf af hestum,“ segir hún. Dæmi séu um að hestar hafi brotist út úr hesthúsum og stokkið á harðastökki í allar áttir vegna hræðslu.

„En ég spyr: er sanngjarnt að stutt skemmtun fáeinna bitni á öryggi, umhverfi, heilsu og líðan manna og dýra? Það eru mörg lönd og borgir sem hafa fundið aðrar leiðir, til dæmis með því að banna sölu flugelda til almennings og halda í staðinn skipulagðar og öruggar flugeldasýningar eða jafnvel ljósasýningar. Kannski er kominn tími til að við á Íslandi tökum upp á einhverjum svoleiðis lausnum,“ segir hún.

Hægt er að skrifa undir undirskriftalistann hér.