Lögreglan á höfuðborgarsvæðinu handtók sjö menn í hverfi 105 fyrir meiriháttar líkamsárás. Þeir voru allir vistaðir í fangageymslu vegna rannsóknar málsins.

Þetta kemur fram í skeyti lögreglu yfir verkefni gærkvöldsins og næturinnar en frekari upplýsingar um árásina koma ekki fram. Alls gista ellefu fangageymslu lögreglu eftir nóttina og eru alls 54 mál skráð í kerfum lögreglu.

Í umdæmi lögreglustöðvar 1 var tilkynnt um tvær aðrar minniháttar líkamsárásir og eru tveir í haldi vegna þeirra.

Í umdæmi lögreglustöðvar 3, sem sinnir Kópavogi og Breiðholti, var svo tilkynnt um enn aðra líkamsárásina. Að sögn lögreglu var gerandi farinn af vettvangi en lögregla mun vita hver viðkomandi er.