Bíleigendur á höfuðborgarsvæðinu hafa vafalítið tekið eftir því síðustu vikur að lítið virðist þurfa til að gera bílana haugskítuga. Segir leiðarahöfundur Morgunblaðsins í dag að eitt af verkefnum borgarinnar sé að halda götunum hreinum en hún hafi algjörlega brugðist.
„Margra mánaða uppsöfnuð óhreinindi liggja á götunum og minnsta væta gerir að verkum að bílarnir ausa skítnum upp af malbikinu og yfir næstu bíla. Margir bílar eru orðnir svo skítugir að það er varla hægt að lesa á númeraplötur þeirra. Þeir eru þaktir drulluskán og mætti ætla að þeim væri aðallega ekið á malarvegum, ef ekki utan vega,” segir í leiðara blaðsins í dag.
Segir höfundur að þetta sjáist vel á björtum dögum þegar veður er stillt. Þá þyrli þungir bílar upp slíku rykskýi að varla sést til sólar. Á sama tíma séu borgarbúar varaðir við að vera á ferli utandyra nálægt helstu umferðaræðum.
„Lítið þýðir að þvo bílinn því hann verður jafnharðan grútskítugur aftur. En þarf þetta að vera svona,” spyr leiðarahöfundur.
Hann segir að undarlega lítill gaumur sé gefinn að því að halda götum borgarinnar hreinum. Víða í stórborgum erlendis séu götur hreinsaðar reglulega og í Berlín séu þær til dæmis hreinsaðar minnst mánaðarlega og oftar þar sem teljast vera borgarkjarnar.
„Hér er ekkert gert allan veturinn og svo fer hreinsunarátak af stað á vorin og stendur fram eftir sumri. Ætla mætti að það væri eitt af sjálfsögðum verkefnum borgaryfirvalda að halda götunum hreinum. Borgin er vissulega blönk og rekstur hennar undanfarin kjörtímabil hefur einkennst af óráðsíu og glundroða. Þetta hefur í allt of miklum mæli verið látið bitna á grunnþjónustu við borgarbúa og er til marks um einstakt metnaðarleysi,” segir leiðarahöfundur að lokum.
