Stjórn Play tilkynnti í morugn að félagið hefði tekið þá ákvörðun að hætta starfsemi, en ljóst er að þetta setur ferðaáform fjölmargra í mikið uppnám, bæði þeirra sem hyggja á utanlandsferðir og eins þeirra sem þegar eru erlendis og áttu bókað flug heim með Play.
Í frétt á vef Neytendasamtakanna er neytendum bent á hvað þeir geta gert.
Hafi flugmiðar verið greiddir með greiðslukortum er nærtækast að hafa samband við þann viðskiptabanka sem sér um greiðslukortið og óska eftir aðstoð við að fá færsluna bakfærða. Einnig er hægt að setja sig í samband við kortafyrirtækin og óska eftir aðstoð þeirra.
Ef farmiðar hafa aftur á móti verið greiddir með gjafabréfi, millifærslu eða með peningum stendur fólki eflaust ekki annað til boða en að leggja inn almenna kröfu á hendur flugfélagsins eða eftir atvikum lýsa almennri kröfu í þrotabú félagsins.
Hafi flugmiðar verið keyptir sem hluti af pakkaferð ber seljandi pakkaferðar ábyrgð á að koma farþegum sínum á áfangastað og til baka aftur.
Þeir sem keypt hafa pakkaferð eða eru nú þegar í pakkaferð, og flughluti ferðarinnar er með flugfélagi sem stöðvar rekstur, ber að snúa sér til seljanda pakkaferðarinnar varðandi frekari upplýsingar.
Farþegar þurfa að lýsa almennri kröfu í þrotabú Play til að sækja rétt sinn til bóta.
Farþegar geta átt rétt á stöðluðum skaðabótum á grundvelli Evrópureglugerðar um réttindi flugfarþega sé fluginu aflýst með minna en tveggja vikna fyrirvara. Fjárhæð bótanna fer eftir því hvert og hvaðan er verið að fljúga. Fyrir flug sem er á milli 1.500 km og 3.500 km (eða flug á milli tveggja EES landa) þá eru bæturnar 400 evrur á hvern farþega. Ef flugið er lengra en 3.500 km (t.d. frá Íslandi til Bandaríkjanna) þá er upphæð bótanna 600 evrur á hvern farþega.
