Þingmaður Samfylkingarinnar í Suðurkjördæmi, Ása Berglind Hjálmarsdóttir, hvetur íbúa Ölfus til að láta í sér heyra hafi þeir athugasemdir við fyrirhugað fasteignaverkefni í Þorlákshöfn.
Segir hún samráðsleysi sveitarstjórnar við íbúa í Ölfusi algjört, og svo virðast sem sveitarstjórn túlki lög á þann veg að ef íbúar skili ekki inn umsögn sinni þá samþykki þeir framkvæmdir. Síðasti dagur til að skila inn athugasemdum er í dag.
„Nú á að ráðast í fasteignaverkefni á milli enda gamla bæjarins svokallaða og hafnarsvæðis, á grænum svæðum sem aðskilja bæinn frá hafnarsvæðinu. Svæðið er ekki stórt í sjálfu sér en á að rúma 155 íbúðir í allt að 5 hæða blokkum sem geta hýst svo gott sem íbúafjölda Eyrarbakka.“
Segir Ása að í Þorlákshöfn og Ölfusi öllu sé gríðarlegt landsvæði og því tilgangslaust að þétta byggð í átt að takmörkuðu landsvæði hafnarinnar, sem þarf líka að hafa svigrúm til þróunar. Segir hún að grænum svæðum fari fækkandi í Þorlákshöfn og full ástæða til að halda í þau og leita frekar leiða til að þróa í þágu íbúa.
„Þögn er sama og samþykki, samkvæmt sveitarfélaginu Ölfusi. 7. ágúst er síðasti dagurinn til þess að senda inn umsögn í skipulagsgátt við þessar fyrirhuguðu breytingar á aðalskipulaginu og miðað við skilning sveitarfélagsins, þá er eins gott að öll sem hafa skoðun á þessu máli geri það, því eins og kemur fram í skjáskoti af heimasíðu sveitarfélagins þá er litið svo á að ef maður sendir ekki inn umsögn í skipulagsferlinu, þá teljist maður ósjálfrátt samþykkur breytingunni.”
Lesa má um fyrirhugaða breytingu í skipulagsgátt og senda inn athugasemdir hér.
Ása segir að hún telji þessa fullyrðingu ekki eiga við rök að styðjast, „en ef þetta er skilningur sveitarfélagsins væri rökrétt að þau sem því stjórna myndu hafa meira fyrir því að kynna svo verulega breytingu á aðalskipulagi með metnaðarfullum hætti fyrir íbúum svo þeir ættu möguleika á að ákveða hvort þeir skili inn umsögn eða þegi þögninni löngu.”
Vísar Ása til 30. gr. skipulagslaga um gerð aðalskipulags, kynningu og samráð þar sem segir:
„Áður en tillaga að aðalskipulagi er tekin til afgreiðslu í sveitarstjórn skal tillagan, forsendur hennar og umhverfismat, þegar við á, kynnt íbúum sveitarfélagsins og öðrum hagsmunaaðilum á almennum fundi eða á annan fullnægjandi hátt. Skal kynningin auglýst með áberandi hætti.”
„Líkt og fyrr hefur samráðsleysi stjórnvalda í Ölfusi við íbúa verið algjört.
Ég hvet þau sem hafa skoðun á málinu að senda inn umsögn á skipulagsgátt eða á skipulag@olfus.is.“
