Brugghús í New York fylki er ósátt við að tónleikar íslensku hljómsveitarinnar Kaleo hafi verið færðir með litlum sem engum fyrirvara. Brugghúsið, sem heldur tónleikaviðburði, segist ekkert hafa fengið að segja um ákvörðunina að færa tónleika sveitarinnar í aðra borg.
Greint er frá þessu í staðarmiðlinum Syracuse.com. En það er borg, norðarlega í New York fylki.
„Við erum vonsvikin,“ segir í tilkynningu brugghússins Frog Alley Brewing, um ákvörðunina að færa tónleikana. „Við fengum bara að vita þetta í dag og ákvörðunin var tekin af skipuleggjendunum án okkar samþykkis eða álits.“
Tónleikarnir áttu að fara fram í dag í bænum Schenectady þar sem brugghúsið heldur viðburði af ýmsum toga, það er undir yfirskriftinni Frog Alley Brewing Summer Stage. En skyndilega voru tónleikarnir færðir til borgarinnar Albany, um 30 kílómetrum í burtu, á stað sem kallast Empire Live.
Tilkynnt hefur verið að allir miðar sem keyptir voru á tónleikana í brugghúsinu muni gilda í Albany. Þar að auki sé hægt að kaupa miða á um 63 dollara, eða um 8 þúsund krónur.
„Þó að við virðum rétt þeirra til þess að framkvæma hluti eins og þeir vilja, þá finnst okkur það að færa tónleikana til annarrar borgar með innan við viku frest hafi ekki aðeins mikil áhrif á okkar viðskiptavini heldur gangi gegn markmiði okkar að færa Schenectady lifandi skemmtiatriði og skapa sterk samfélagstengsl í gegnum þá viðburði,“ segir í tilkynningu brugghússins.
Að sögn Frog Alley Brewing hafa ekki borist neinar skýringar á því hvers vegna tónleikarnir voru færðir. Þegar þetta er skrifað er Schenenctady enn þá skráður sem tónleikastaðurinn á heimasíðu Kaleo.
Þrátt fyrir að tónleikarnir hafi verið færðir þá hyggst brugghúsið gefa svekktum viðskiptavinum sínum glaðning. Allir sem keyptu miða á tónleika Kaleo á Frog Alley Brewing Summer Stage fá frían drykk á barnum.
„Sýnið bara barþjóninum miðann ykkar,“ segir í tilkynningunni. „Við kunnum vel að meta stuðning ykkar og skilning og vonum að þetta atvik rýri ekki reynslu ykkar eða álit á Frog Alley. Við erum staðráðin í að halda áfram að flytja topp klassa skemmtiatriði til borgarinnar okkar og til viðskiptavina okkar sem við metum mjög.“
