Það getur verið dýrt og jafnvel fokdýrt að ferðast til annarra landa, en Ísland skipar sér í sérstöðu og er efst á listanum yfir þá dýrustu í heimi fyrir Bandaríkjamenn að heimsækja.
Ísland er dýrasti vinsælasti ferðamannastaðurinn árið 2025, samkvæmt nýlegri rannsókn sem The Forex Complex gerði og vefurinn Travel + Leisure greinir frá í gær. Fjármálafyrirtækið mat 19 alþjóðlega áfangastaði og komst að því að meðalkostnaður við frí á Íslandi var meira en 400 dalir á dag (um 49.179 krónur), sem er hæsti kostnaður allra landa sem tóku þátt í rannsókninni.
Að auki benti skýrslan á að verðbólga á Íslandi væri 5,5% sem bætir við heildarkostnað vegna hótela, matar og samgangna.
„Sveiflur í gengi gjaldmiðla geta breytt ferðakostnaði verulega, jafnvel í löndum með stöðugt verðlag á staðnum. Þó daglegur kostnaður hafi áhrif á hvort ferðalangar telji ferðalagið hagkvæmt, geta breytingar á gengi gjaldmiðla ráðið úrslitum um hvort bandarískir ferðamenn hafi hreinlega efni á ferðinni,“ sagði talsmaður The Forex Complex í yfirlýsingu sem deilt var með T+L. „Árið 2025 gætu ferðamenn sem horfa fram hjá þróun gengis gjaldmiðla átt von á dýrara sumri en búist var við.“
Næst dýrasti áfangastaðurinn var Ástralía þar sem daglegur kostnaður vegna ferðalaga nam um 280 dölum (um 34.426 krónum) á dag. Verðbólga í Ástralíu er tiltölulega lág, aðeins 2,4 %, en kostnaður er enn hár.
Mexíkó er í þriðja sæti á listanum, að hluta til vegna mikillar 6,4 % hækkunar á gengi gjaldmiðilsins (mexíkóska pesóans) gagnvart Bandaríkjadal. Þetta bætir við kostnað fyrir bandaríska ferðamenn og gæti vegið upp á móti tiltölulega ódýru verði sem annars myndi gera Mexíkó að hagkvæmari áfangastað.
Vinsælir áfangastaðir bandarískra ferðamanna í Evrópu, eins og Bretland, Þýskaland og Ítalía, eru nú ódýrari þökk sé hagstæðara gengi gjaldmiðla, en hátt dagverð heldur þeim samt í efstu 10 sætunum. (Bretland lenti í 8. sæti, Þýskaland í 9. sæti og Ítalía í 10. sæti.)
Ódýrasti áfangastaðurinn sem tekinn var með í rannsókninni var Thailand, þar sem meðalútgjöld á dag eru aðeins 81,87 dalir (rétt um 10.000 krónur) og gjaldmiðillinn (taílenski bahtinn) er veikari miðað við Bandaríkjadal. Indónesía var næst hagkvæmasti áfangastaðurinn með meðalkostnað upp á aðeins 70,23 dali (um 8.634 kr.), en verðbólga upp á 1,95 prósent hindraði það.
Til að ákvarða niðurstöðurnar vó Forex Complex þrjá þætti: meðalkostnað daglegs ferðakostnaðar í dölum, verðbólgu á staðnum og breytingu á gengi gjaldmiðils áfangastaðarins miðað við Bandaríkjadal milli ára. Rannsóknin tók tillit til nokkurra algengra útgjalda, þar á meðal kostnaðar við gistingu, samgöngumöguleika og verðs á máltíðum.
