Vefurinn Glatkistan, sem hýsir greinar um íslenska tónlist, mun brátt loka. Ekki tókst að fá auglýsendur eða hið opinbera til þess að styrkja verkefnið.

Frá þessu greinir Helgi Jónsson, sem heldur úti vefnum, í gær. En Glatkistan er stærsti gagnagrunnur sem til er á netinu um íslenska tónlist.

„Glatkistan hefur nú verið aðgengileg á veraldarvefnum í rúmlega áratug og hefur hlotið töluverða athygli eftir því sem gagnagrunnur vefsíðunnar (um 6000 greinar) hefur stækkað, síðuna heimsækja nú í hverjum mánuði um 30 þúsund gestir að jafnaði,“ segir Helgi í grein á síðunni. „Þrátt fyrir það hafa auglýsendur ekki sýnt síðunni áhuga og styrki frá hinu opinbera má telja á fingrum annarrar handar, fáeinir einstaklingar hafa þó styrkt framtakið með frjálsum framlögum.“

Lokakaflinn hafi verið tilraun til þess að fá Landsbókasafnið og ráðuneyti menningarmála í samstarf en það gekk ekki eftir. Segir hann því lítið annað í stöðunni en að „loka sjoppunni“ sem sé sorglegt í ljósi þess að Glatskistan sé stærsti gagnagrunnurinn um íslenska tónlist.

Segist Helgi vonast til þess að einhver framlög komi inn fyrir hýsingu til þess að Glatkistan verði aðgengileg í einhvern tíma en líklega verði nýju efni ekki bætt við nema eitthvað mjög óvænt gerist.

„Það stoðar lítið að gráta þótt efnið (og það sem liggur eftir hálf- og óunnið) hverfi nú „í glatkistuna“ en ég vil þess í stað þakka þeim fjölmörgu sem hafa lagt lið við efnisöflun, ábendingar, leiðréttingar, myndefni og annað, og þeim lesendum sem hafa heimsótt vefinn og nýtt sér hann til fróðleiks, í námi eða til skemmtunar. Ég fer sáttur frá borði og get eytt frítíma mínum í önnur hugðarefni,“ segir Helgi að lokum.