Morgunblaðið greinir frá því á forsíðu sinni að endurgreiðslur úr ríkissjóði til sveitarfélaga vegna fjárhagsaðstoðar til erlendra ríkisborgara sem hér dvelja hafi numið tæpum 13 milljörðum króna á tímabilinu 2019 til 2024. Bent er á það í umfjöllun blaðsins að líkur séu á að upphæðin sé hærri þar sem uppgjöri síðasta árs er ekki lokið að fullu.
Það var Diljá Mist sem óskaði eftir svörum varðandi þetta frá Ingu Sæland, félags- og húsnæðismálaráðherra og barst svarið fyrir skemmstu.
Bent er á það í Morgunblaðinu að stór hluti hafi farið til Úkraínumanna sem hér dvelja en Diljá segir hátt hlutfall styrkþega af öðrum þjóðernum vekja athygli. Greiðslurnar voru hæstar árið 2023, eða tæpir 4,7 milljarðar króna.
Diljá spurði Ingu einnig hvort hún hygðist nýjar reglur um aðstoð samkvæmt ákvæðum laga. Í svarinu segir að hún hafi í hyggju að endurskoða endurgreiðslu ríkissjóðs til sveitarfélaga en gert sé ráð fyrir því að sú vinna fari fram í samráði við sveitarfélögin.
Í samtali við Morgunblaðið segir Diljá að Inga hafi svarað þessu dauflega og minnir á að Flokkur fólksins hafi keyrt á því í aðdraganda kosninga að kostnaður við málaflokk útlendinga væri of hár.
