Samningur körfuboltafélagsins Aþenu við Reykjavíkurborg um afnot af íþróttahúsinu í Austurbergi í Breiðholti hefur verið endurnýjaður. Lengi leit út fyrir að ekkert yrði af samningnum og að starfsemi Aþenu myndi leggjast af en liðsmenn félagsins þrýstu mjög á borgina um að endurnýja hann. Brynjar Karl Sigurðsson stjórnarmaður í félaginu og þjálfari meistaraflokks kvenna hefur farið þar framarlega í flokki hann segir í Facebook-færslu að tilfinningar hans vegna endurnýjunarinnar séu blendnar. Það sé ánægjulegt að félagið geti haldið starfinu áfram en að tafirnar sem urðu á endurnýjuninni hafi hins vegar valdið töluverðu tjóni.
Brynjar Karl biður um að beðið sé með allan fögnuð og fer síðan nánar yfir hver áhrifin hafa orðið á starfsemi félagsins vegna þess hversu dregist hefur að endurnýja samninginn:
„Staða starfsins okkar er í molum. Ég ætla ekki að fara nánar út í það annað en að nokkur verkefni sem áttu að hefjast í haust frestast um að minnsta kosti eitt ár. Við höfum misst dýrmæt starfsfólk sem hafa verið í þjálfun undanfarin ár og einnig leikmenn. Meistaraflokkur hefur ekki getað hafið undirbúning sinn fyrir komandi tímabil vegna óvissu í leikmannamálum sem nú er komin fram á mitt sumar. Körfuboltaskólinn (ókeypis fyrir hverfið), sem átti að hefjast strax eftir skólalok, byrjar næstkomandi mánudag ef næg þátttaka fæst. Það hefur lítið annað komist að síðustu 8 vikur en að bjarga þessu starfi og það er með ólíkindum að vera sjálfboðaliði og þurfa að upplifa þessi vinnubrögð.“
Brynjar Karl segir alveg ljóst hverjum það sé að þakka að loks hafi tekist að semja við borgina:
„Ef það væri ekki fyrir stelpurnar okkar væri ég löngu búinn að leggja þetta starf niður. Ég get ekki með góðri samvisku mælt með samstarfi við borgaryfirvöld höfuðborgar Íslands. Mig langar sérstaklega að hrósa ungu stúlkunum okkar sem mótmæltu fyrir utan ráðhúsið og söfnuðu tæplega 4000 undirskriftum. Þvílíkur kraftur! Ekkert smá stoltur af mínum stelpum. Þetta hefði aldrei gerst án ykkar baráttu. Þið eruð Aþena!“
