Inga er með endómetríósu og í fréttum RÚV á mánudag kom fram að hún hefði gengið á milli lækna í sex ár og ítrekað verið send heim með verkjalyf. Það var ekki fyrr en hún leitaði til sérfræðings á Klíníkinni að greining fékkst en þá fékk hún að vita að verkirnir stöfuðu að líkindum af endómetríósu.
Bent var á það í umfjöllun RÚV að heilbrigðisráðuneytið hefði falið Sjúkratryggingum Íslands að semja um greiðsluþátttöku fyrir hundrað aðgerðir vegna endómetríósu á þessu sem þegar hafa verið framkvæmdar á Klíníkinni. Hundrað til viðbótar eru á biðlista eftir aðgerð og þurfa þeir að greiða aðgerðina úr eigin vasa ef þeir vilja komast í hana á þessu ári.
Endósamtökin sendu út yfirlýsingu í gær vegna málsins þar sem þau lýstu áhyggjum sínum af því að heilbrigðisráðuneytið hefði ákveðið að fækka niðurgreiddum aðgerðum.
Í grein á vef Vísis bendir Diljá Mist á að hún hafi tekið upp stöðu þessa viðkvæma sjúklingahóps í sérstakri umræðu um heilbrigðismál í þinginu.
„Þrautaganga sjúklinga með endó hefur verið með slíkum ólíkindum. Sjúkdómurinn getur valdið hryllilegum verkjum og ófrjósemi og þar til á síðasta kjörtímabili biðu konur lengi – sárþjáðar – eftir opinberri heilbrigðisþjónustu. Langt umfram viðmiðunarmörk landlæknis. Þær sem höfðu efni á, og reyndar líka þær sem höfðu það ekki, gáfust upp á biðinni og greiddu einkaaðilum háar fjárhæðir úr eigin vasa fyrir heilbrigðisþjónustu. Í ákalli til stjórnvalda sögðu Endósamtökin það vera nöturlega staðreynd að aðgengi að nauðsynlegri heilbrigðisþjónustu á Íslandi færi eftir efnahag,” segir Diljá.
Hún bendir svo á að bót hafi orðið á málum á síðasta kjörtímabili þegar þáverandi heilbrigðisráðherra samdi við einkaaðila um þjónustu sjúklinga með endó. Með því hafi biðlistar orðið styttri og sjúklingar með endó orðið jafnsettir í íslensku heilbrigðiskerfi, óháð efnahag.
Endar hún grein sína á eins konar ákalli til Ölmu Möller heilbrigðisráðherra vegna málsins.
„Stjórnmálamenn segjast gjarnan leggja áherslu á jafnt aðgengi að heilbrigðisþjónustu og því er staðan sem nú er komin upp mikill prófsteinn á störf nýs heilbrigðisráðherra, Ölmu Möller. Staðan er sömuleiðis prófsteinn á Samfylkinguna sem hefur lagt mikla áherslu á heilbrigðiskerfið í sínum málflutningi, en ekki síður á Viðreisn sem ber ábyrgð á setu Ölmu í þessari ríkisstjórn. Mun nýr heilbrigðisráðherra hugsa um hag endó-sjúklinga? Eða munu gamaldags hugsun og fordómar í garð einkaaðila byrgja henni sýn?“
