Afbrotafræðingurinn Jón Óttar Ólafsson og gamla spæjarastofan hans, fyrirtækið PPP sf., höfðu undir höndum bæði rannsóknargögn lögreglu og gögn sem sérstakur saksóknari aflaði sér með dómsúrskurði. Um er að ræða stolin gögn en Kastljós mun fjalla nánar um málið í kvöld. Fréttaflutningurinn tengist stórum gagnaleka en ætla má af boðaðri umfjöllun Kastljóss og umfjöllun Kveiks fyrir rúmri viku síðan að gögnin komi beint úr geymslum spæjarastofunnar.

Kveikur fjallaði í síðustu viku um njósnir sem PPP sf. tók að sér fyrir auðkýfinginn Björgólf Thor Björgólfsson. PPP sf. var stofnað af þeim Jóni Óttari Ólafssyni og Guðmundi Hauki Gunnarssyni. Fyrirtækið stofnuðu þeir rétt áður en þeir létu af störfum fyrir embætti sérstaks saksóknara í skugga þungra ásakana, en þeir voru grunaðir um að hafa brotið gegn þagnarskyldu í starfi þegar þeir létu skiptastjóra Milestone hafa rannsóknargögn sem vörðuðu fyrirtækið. Málið þótti þó ekki líklegt til sakfellis og var fellt niður.

RÚV greinir frá því að PPP hafi haft undir höndum persónuupplýsingar úr stórum sakamálum lögreglunnar á höfuðborgarsvæðinu. Þessi gögn notuðu þeir svo til að kynna starfsemi sína fyrir fyrirtækjum og stofnunum. Eins var um að ræða gögn frá embætti sérstaks saksóknara sem var aflað eftir dómsúrskurð og vörðuðu rannsókn mála hjá embættinu.

Ólafur Þór Hauksson, héraðssaksóknari sem gegndi embætti sérstaks saksóknara þegar PPP var stofnað, segir að hér sé um að ræða gögn sem eigi ekki að vera úti í samfélaginu heldur gögn sem ættu að vera bundin trúnaði og hefðu aldrei átt að fara út úr húsakynnum embættisins. Ólafur Þór man engin fordæmi þess að eins umfangsmiklum gögnum hafi verið stolið frá embættinu.