Fjórir menn hafa verið ákærðir fyrir sérstaklega hættulega líkamsárás, frelsissviptingu, hótanir og rán með því að hafa í félagi, á laugardegi á síðasta ári, svipt pilt undir lögaldri frelsi sínu í allt að 45 mínútur og beitt hann margvíslegu ofbeldi.

Þeir fóru allir fjórir í bíl að húsnæði þar sem brotaþoli var gestkomandi. Þrír þeirra fór inn í húsið og sóttu hann og létu hann setjast inn í bílinn gegn vilja sínum. Tóku þeir af honum síma og heyrnartól. Þeir óku með piltinn að ónefndum stað í Reykjavík þar sem þeir fóru allir út úr bílnum og veittust með ofbeldi að brotaþola sem féll í jörðina við árásina.

Í ákæru er árásinni síðan lýst svona, og notast við bókstafi í stað nafna málsaðila:

„…en ákærðu slógu A margsinnis með krepptum hnefum í höfuð og búk og spörkuðu margsinnis í höfuð hans og búk þar sem hann lá á jörðinni, ákærði X gaf honum rafstuð í hægri upphandlegg og á vinstri framhandlegg með rafmagnsvopni og ákærði Y otaði hnífi að hálsi, bringu og kviðarholi A og hótaði að drepa hann og fjölskyldu hans ef hann segði frá, en ákærðu skildu A eftir beran að ofan og skólausan […], allt með þeim afleiðingum að A hlaut heilahristing, brot á báðum efri miðframtönnum og marga yfirborðsáverka á höfði, á handleggjum og á brjóstkassa.“

Móðir brotaþola gerir fyrir hönd ólögráða sonar síns kröfu um miskabætur frá hinum ákærðu upp á 4,5 milljónir króna.

Málið var þingfest í Héraðsdómi Reykjavíkur þann 30. apríl. Réttarhöld í málinu eru háð fyrir luktum dyrum. Ekki liggur fyrir aldur brotaþola og hinna ákærðu enda margskonar upplýsingar hreinsaðar úr ákæru héraðssaksóknara til fjölmiðla. Fyrir liggur þó að brotaþoli er undir 18 ára aldri en DV hefur ekki upplýsingar um hvort árásarmennirnir eru eldri eða ekki.