Guðmundur Halldórsson, framkvæmdastjóri Te & kaffi, segir að innkaupsverð fyrirtækisins sé orðið næstum tvöfalt hærra en á síðasta ári og bæst hafi við hundruð milljóna króna í aukinn innkaupakostnað. Kaffiverð hefur hækkað mikið frá síðustu áramótum og sér ekki enn fyrir endann á þessum hækkunum.

Fjallað er um þetta í Morgunblaðinu í dag og bent á hvað einstaka tegundir hafa hækkað mikið í verði. Þannig hafi til dæmis 400 gramma poki af French Roast-baunum frá Te & kaffi hækkað um 33% í Nettó á árinu og poki af Rúbín-kaffi hækkað um 19% í Krónunni.

Birgjar hafa hækkað verð að undanförnu og segir til dæmis í frétt Morgunblaðsins að Coca Cola hafi látið viðskiptavini sína vita af hækkunum á heimsmarkaðsverði. Verðið hafi hækkað um 19% frá áramótum og 92% á síðustu 12 mánuðum.

Ástæða hækkunarinnar er uppskerubrestur sem hefur orðið á stærstu ræktunarsvæðum heimsins og segir Guðmundur að lagerstaða á hrákaffi sé sögulega lág. Segir hann að verð á heimsmörkuðum sé enn í hæstu hæðum og ekki útlit fyrir annað en að það verði það áfram út árið og mögulega lengur.

„Við get­um ekki annað en hækkað verðið til að stemma stigu við þessu. Við verðum að geta staðið við skuld­bind­ing­ar okk­ar gagn­vart birgj­um og halda rekstr­in­um á rétt­um kili,“ segir Guðmundur við Morgunblaðið þar sem nánar er fjallað um málið.