Dæmi eru um að sót berist inn um glugga og setjist í gluggakistur hjá íbúum í nágrenni Fossvogskirkjugarðs. Ástæðan er líkbrennsla sem starfrækt er í garðinum og hefur ástandið verið mjög slæmt að undanförnu.

Þetta kemur fram í frétt Morgunblaðsins í dag en þar kemur fram að Heilbrigðiseftirlit Reykjavíkur hafi sent ábendingu til kirkjugarðanna vegna þessa.

Sjá einnig: Foreldrar leikskólabarna í Fossvogi búnir að fá sig fullsadda af líkbrennslunni – „Anda skaðlegum svörtum reyk ofan í litlu lungun sín“

Haft er eftir Ingvari Stefánssyni, framkvæmdastjóra Kirkjugarða Reykjavíkurprófastsdæma, að hann hafi fullan skilning á þessum óþægindum en bendir á að í síðustu viku hafi þurft að nota varaofn sem er ekki jafn góður og sá sem yfirleitt er notaður.

„Það er orðið mjög brýnt að ákvörðun verði tek­in sem fyrst um að ný bál­stofa með full­nægj­andi meng­un­ar­vörn­um verði byggð,“ segir hann og bætir við að staðið hafi til í um 20 ár að líkbrennslan færi í Gufunes. Ekki verði farið í frekari fjárfestingu þar nema rekstur sé tryggður og afstaða ráðuneytisins liggi fyrir.

Í frétt Morgunblaðsins er einnig rætt við Ásgeir Björnsson hjá Heilbrigðiseftirliti Reykjavíkur sem segir að verið sé að endurskoða starfsleyfi bálstofu Kirkjugarða Reykjavíkur. Bendir hann á að núverandi ofnar séu ekki með hreinsibúnað eins og tíðkast í nágrannalöndum.