Marjorie Taylor Greene, þingmaður Repúblikana, olli usla á samfélagsmiðlinum X þegar hún virtist fagna andláti Frans páfa. Taylor Greene, sem kallar sig kristilegan þjóðernissinna, er ákafur stuðningsmaður Donald Trump og MAGA-hreyfingar hans og heldur sig lengst til hægri á hinu pólitíska rófi.

Níu klukkustundum eftir að tilkynnt var um andlát Frans tísti hún: „Í dag urðu stórar breytingar í forystusveit heimsins. Hið illa er lúta í lægra haldi fyrir hönd guðs.“

Í kjölfarið skall reiðialda á þingmanninum enda hinn fallni páfi afar vinsæll og ekki síst fyrir góðmennsku sína og baráttu fyrir málstað þeirra sem eiga undir högg að sækja.

Taylor Greene var alin upp sem kaþólikki en gerðist mótmælandi árið 2011 og hefur síðan verið harður gagnrýnandi kaþólsku kirkjunnar, sérstaklega útaf málum sem tengjast kynferðislegri misnotkun starfsmanna krikjunnar gagnvart börnum.