Verktakafyrirtæki hefur lagt fram stefnu á hendur öðru fyrirtæki. Verktakafyrirtækið var ráðið sem undirverktaki síðarnefnda fyrirtækisins vegna framkvæmda við fasteign í Hveragerði sem fólust meðal annars í byggingu bílskúrs. Verktakafyrirtækið hefur hins vegar ekkert enn fengið greitt fyrir þjónustu sína frá hinu fyrirtækinu sem ráðið var af eiganda fasteignarinnar, sem verktaki. Ekkert hefur gengið að ná sambandi við forsvarsmenn síðarnefnda fyrirtækisins og því er stefna til greiðslu skuldarinnar birt í Lögbirtingablaðinu.
Fyrirtækið sem ráðið var sem verktaki við framkvæmdirnar er raunar skráð í fyrirtækjaskrá Skattsins í atvinnugreinaflokkinn vöruflutningar með flugi. Skráður eigandi er erlend kona með íslenska kennitölu sem samkvæmt stefnunni í Lögbirtingablaðinu hefur aldrei átt lögheimili á Íslandi.
Undirverktakinn krefur fyrirtækið um upphæð sem nemur um á þriðja milljóna króna, auk vaxta og dráttarvaxta. Fyrirtækið var eins og áður segir ráðið sem verktaki vegna framkvæmda við fasteignina sem er í Hveragerði. Undirverktakinn sá um að reisa bílskúr auk þess að klæða fasteignina að utan. Krefst undirverktakinn greiðslu vegna efniskostnaðar og vinnuframlags.
Segir í stefnunni í Lögbirtingablaðinu að skuldin hafi ekki fengist greidd þrátt fyrir ítrekaðar innheimtutilraunir og því telji undirverktakinn nauðsynlegt að höfða málið.
Samkvæmt stefnunni var undirverktakinn í samskiptum við íslenskan starfsmann og varamann í stjórn hins stefnda fyrirtækis, vegna verksins. Lögheimili fyrirtækisins og þessa starfsmanns hafi verið skráð hið sama. Í fyrirtækjaskrá er hins vegar fyrirtækið skráð með póstfang á umræddu heimilisfangi en ekkert heimilisfang er skráð sem lögheimili.
Í stefnunni segir að reynt hafi verið að birta hana þessum starfsmanni að þessu heimilisfangi en það hafi engan árangur borið. Hvorki fyrirsvarsmaður félagsins, hin erlenda kona sem aldrei hafi verið með lögheimili á Íslandi, né aðrir starfsmenn hafi fundist þar fyrir. Ekki sé unnt að afla upplýsinga um hvar birta megi stefnuna eftir almennum reglum og því sé hún birt í Lögbirtingablaðinu.
Skorað er í stefnunni á fyrirtækið að greiða undirvertakanum skuldina eða þá mæta fyrir Héraðsdóm Suðurlands þar sem málið verði tekið fyrir í næsta mánuði. Mæti enginn af hálfu þess má búast við því að krafa undirverktakans verði gerð aðfararhæf gagnvart fyrirtækinu.
